bojh itna hai mere shane par

bojh itnā hai mere shāne par

maiñ ki majbūr huuñ uThāne par

dosto mujh se ho ga.e barham

be-basar aa.ina dikhāne par

ab uḌūñgā maiñ apnī himmat se

lag ga.e haiñ mujhe zamāne par

bach ke niklā thā jo kabhī mujh se

aa gayā hai mire nishāne par

aa bhī jā.eñge zer-e-dām āḳhir

ye jo aate haiñ ek daane par

ik nazar hai tire ta.āqub meñ

ik nazar hai mirī zamāne par

ghar banāyā thā aur niyyat se

aa gayā huuñ maiñ ab jalāne par

duniyā aa.egī baad marne ke

ham faqīroñ ke āstāne par

rafta rafta ab aa ga.ī 'tanhā'

zindagī maut ke dahāne par

bojh itna hai mere shane par

main ki majbur hun uThane par

dosto mujh se ho gae barham

be-basar aaina dikhane par

ab uDunga main apni himmat se

lag gae hain mujhe zamane par

bach ke nikla tha jo kabhi mujh se

aa gaya hai mere nishane par

aa bhi jaenge zer-e-dam aaKHir

ye jo aate hain ek dane par

ek nazar hai tere taaqub mein

ek nazar hai meri zamane par

ghar banaya tha aur niyyat se

aa gaya hun main ab jalane par

duniya aaegi baad marne ke

hum faqiron ke aastane par

rafta rafta ab aa gai 'tanha'

zindagi maut ke dahane par