bojh KHwabon ka un aankhon se bahut Dhoya tha

bojh ḳhvāboñ kā un āñkhoñ se bahut Dhoyā thā

aur phir maiñ bhī natīje meñ lahū royā thā

dukh meñ shirkat kā yaqīñ ho bhī use to kaise

dil se royā thā maiñ āñkhoñ se nahīñ royā thā

dekh kar fasl añdheroñ kī ye hairat kaisī

tū ne khetoñ meñ ujālā hī kahāñ boyā thā

gum agar suuī bhī ho jaa.e to dil dukhtā hai

aur ham ne to mohabbat meñ tujhe khoyā thā

jiit is baar bhī kachhve kī huī hairat hai

dauḌ meñ ab ke to ḳhargosh nahīñ soyā thā

jism nāsūroñ se sajnā hī thā tum ne 'shādāb'

paTTiyāñ dhoī thiiñ zaḳhmoñ ko kahāñ dhoyā thā

bojh KHwabon ka un aankhon se bahut Dhoya tha

aur phir main bhi natije mein lahu roya tha

dukh mein shirkat ka yaqin ho bhi use to kaise

dil se roya tha main aankhon se nahin roya tha

dekh kar fasl andheron ki ye hairat kaisi

tu ne kheton mein ujala hi kahan boya tha

gum agar sui bhi ho jae to dil dukhta hai

aur hum ne to mohabbat mein tujhe khoya tha

jit is bar bhi kachhwe ki hui hairat hai

dauD mein ab ke to KHargosh nahin soya tha

jism nasuron se sajna hi tha tum ne 'shadab'

paTTiyan dhoi thin zaKHmon ko kahan dhoya tha