bujh chuka suraj andhera ho chuka hai dosto

bujh chukā sūraj añdherā ho chukā hai dosto

duur mujh se merā saaya ho chukā hai dosto

chāñd ko chhū kar ḳhudā kī zaat ke munkir hue

qad hamārā kitnā ūñchā ho chukā hai dosto

dafn jo sadiyoñ rahā tahzīb ke ambār meñ

tang aa kar ab vo nangā ho chukā hai dosto

jism kyā dil kyā jigar kyā ruuh tak chhalnī huī

vaqt kā bartāv aisā ho chukā hai dosto

qurb se jis ke mahak uTThe the ye dīvār-o-dar

rang us ḳhushbū kā mailā ho chukā hai dosto

jo ghirā rahtā thā kal tak dostoñ kī bhiiḌ meñ

aaj vo bilkul akelā ho chukā hai dosto

ab to apne aap se milne kī bhī fursat nahīñ

is qadar 'shādāb' tanhā ho chukā hai dosto

bujh chuka suraj andhera ho chuka hai dosto

dur mujh se mera saya ho chuka hai dosto

chand ko chhu kar KHuda ki zat ke munkir hue

qad hamara kitna uncha ho chuka hai dosto

dafn jo sadiyon raha tahzib ke ambar mein

tang aa kar ab wo nanga ho chuka hai dosto

jism kya dil kya jigar kya ruh tak chhalni hui

waqt ka bartaw aisa ho chuka hai dosto

qurb se jis ke mahak uTThe the ye diwar-o-dar

rang us KHushbu ka maila ho chuka hai dosto

jo ghira rahta tha kal tak doston ki bhiD mein

aaj wo bilkul akela ho chuka hai dosto

ab to apne aap se milne ki bhi fursat nahin

is qadar 'shadab' tanha ho chuka hai dosto