bujh gai dil ki kiran aaina-e-jaan TuTa

bujh ga.ī dil kī kiran ā.īna-e-jāñ TuuTā

par-e-parvāz sameTe to lahū sā phūTā

rasm-e-āshufta-sarī meñ haiñ garebāñ dāman

falak-e-pīr batā kaun hai sachchā jhūTā

chāñd sūraj hue jaate haiñ dhueñ meñ rū-posh

jaras-e-vaqt kahāñ aag kā chashma phūTā

marsiyoñ aur qasīdoñ se bharī hai mahfil

shahr-āshob se har rishta-e-dānish TuuTā

shajar-e-dard kī har shāḳh hai kashkol-numā

sar-kashīda hai magar baaġh kā buuTā buuTā

vahī kaifiyyat-e-chashm-o-dil-o-jāñ hai 'iqbāl'

na koī rabt banā aur na rishta TuuTā

bujh gai dil ki kiran aaina-e-jaan TuTa

par-e-parwaz sameTe to lahu sa phuTa

rasm-e-ashufta-sari mein hain gareban daman

falak-e-pir bata kaun hai sachcha jhuTa

chand suraj hue jate hain dhuen mein ru-posh

jaras-e-waqt kahan aag ka chashma phuTa

marsiyon aur qasidon se bhari hai mahfil

shahr-ashob se har rishta-e-danish TuTa

shajar-e-dard ki har shaKH hai kashkol-numa

sar-kashida hai magar bagh ka buTa buTa

wahi kaifiyyat-e-chashm-o-dil-o-jaan hai 'iqbaal'

na koi rabt bana aur na rishta TuTa