bujha bhi ho to ujala meri nazar mein rahe

bujhā bhī ho to ujālā mirī nazar meñ rahe

koī charāġh to aisā bhī mere ghar meñ rahe

banā banā ke bigāḌā gayā hameñ aksar

misāl-e-kūza kisī dast-e-kūza-gar meñ rahe

hisār-e-ishq se bāhar nikal sake na kabhī

ki ham bichhaḌ ke bhī tujh se tire asar meñ rahe

rah-e-safar meñ sar-e-shām ham Thahar to ga.e

magar kuchh aise ki jaise koī safar meñ rahe

firāq-e-yār hī taqdīr ho to kyā kiije

visāl-e-yār kā saudā hazār sar meñ rahe

nigāh ḳhuub sahī dūsroñ ke aiboñ par

magar ḳhud apnā garebān bhī nazar meñ rahe

na ho ḳhushī kā gumāñ aise ġham pe kyuuñ 'ḳhāvar'

jo ġham ḳhushī kī tarah qalb-e-mo'atabar meñ rahe

bujha bhi ho to ujala meri nazar mein rahe

koi charagh to aisa bhi mere ghar mein rahe

bana bana ke bigaDa gaya hamein aksar

misal-e-kuza kisi dast-e-kuza-gar mein rahe

hisar-e-ishq se bahar nikal sake na kabhi

ki hum bichhaD ke bhi tujh se tere asar mein rahe

rah-e-safar mein sar-e-sham hum Thahar to gae

magar kuchh aise ki jaise koi safar mein rahe

firaq-e-yar hi taqdir ho to kya kije

visal-e-yar ka sauda hazar sar mein rahe

nigah KHub sahi dusron ke aibon par

magar KHud apna gareban bhi nazar mein rahe

na ho KHushi ka guman aise gham pe kyun 'KHawar'

jo gham KHushi ki tarah qalb-e-mo'atabar mein rahe