bujhe bujhe hue dagh-e-jigar ki baat na kar

bujhe bujhe hue dāġh-e-jigar kī baat na kar

bhaḌak uThegā ye sho.ala sahar kī baat na kar

bas ek baar mohabbat se dekhne vaale

ye vo karam hai ki bār-e-digar kī baat na kar

taras na jaa.eñ kahīñ rañg-o-bū ko ahl-e-chaman

guloñ ko dekh ke zaḳhm-e-jigar kī baat na kar

matā-e-dard baḌhā aur muskurā.e jā

shab-e-firāq numūd-e-sahar kī baat na kar

nayā nahīñ hai ye hañgāma ahl-e-dil ke liye

sukūt-e-ā.ina-e-ḳhud-nigar kī baat na kar

kahāñ kahāñ se guzarnā hai be-niyāzāna

nazar se dekh shu.ūr-e-nazar kī baat na kar

ye phuul haiñ mire 'nashtar' jigar ke daaġh nahīñ

fareb-ḳhurda-e-shabnam guhar kī baat na kar

bujhe bujhe hue dagh-e-jigar ki baat na kar

bhaDak uThega ye shoala sahar ki baat na kar

bas ek bar mohabbat se dekhne wale

ye wo karam hai ki bar-e-digar ki baat na kar

taras na jaen kahin rang-o-bu ko ahl-e-chaman

gulon ko dekh ke zaKHm-e-jigar ki baat na kar

mata-e-dard baDha aur muskurae ja

shab-e-firaq numud-e-sahar ki baat na kar

naya nahin hai ye hangama ahl-e-dil ke liye

sukut-e-aina-e-KHud-nigar ki baat na kar

kahan kahan se guzarna hai be-niyazana

nazar se dekh shuur-e-nazar ki baat na kar

ye phul hain mere 'nashtar' jigar ke dagh nahin

fareb-KHurda-e-shabnam guhar ki baat na kar