bujhe na shama-e-gham-e-dil to kya sahar hona

bujhe na sham.a-e-ġham-e-dil to kyā sahar honā

dalīl-e-sub.h nahīñ raat kā basar honā

kabhī zamīñ pe kabhī taḳht-e-arsh par honā

sikhā diyā hai kisī ne hameñ bashar honā

kabhī idhar se guzarnā kabhī udhar honā

hai kuchh na kuchh to havāoñ kā mere sar honā

hazār marhala-e-daur se guzarnā hai

koī mazāq nahīñ shaam kā sahar honā

khaTak rahā hai dil-e-bāġhbāñ meñ kāñTā sā

chaman se pyaar mirā matmah-e-nazar honā

hañsī nahīñ hai ġham-e-zīst kā bharam rakhnā

ḳhudī kī aag meñ jalnā hai dīda-var honā

girāñ bahut hī girāñ ahl-e-dil pe guzrī hai

tirā rumūz-e-mohabbat se be-ḳhabar honā

fasīl-e-shahr pe rakh dī hai ham ne sham-e-vafā

fusūn-e-shab kā hai dushvār kārgar honā

hai nukta-ras to koī nukta-chīn ai 'shāriq'

tazād-e-zāt banā sāhab-e-hunar honā

bujhe na shama-e-gham-e-dil to kya sahar hona

dalil-e-subh nahin raat ka basar hona

kabhi zamin pe kabhi taKHt-e-arsh par hona

sikha diya hai kisi ne hamein bashar hona

kabhi idhar se guzarna kabhi udhar hona

hai kuchh na kuchh to hawaon ka mere sar hona

hazar marhala-e-daur se guzarna hai

koi mazaq nahin sham ka sahar hona

khaTak raha hai dil-e-baghban mein kanTa sa

chaman se pyar mera matmah-e-nazar hona

hansi nahin hai gham-e-zist ka bharam rakhna

KHudi ki aag mein jalna hai dida-war hona

giran bahut hi giran ahl-e-dil pe guzri hai

tera rumuz-e-mohabbat se be-KHabar hona

fasil-e-shahr pe rakh di hai hum ne sham-e-wafa

fusun-e-shab ka hai dushwar kargar hona

hai nukta-ras to koi nukta-chin ai 'shaariq'

tazad-e-zat bana sahab-e-hunar hona