bujhi bujhi si hai aankhon ki raushni meri

bujhī bujhī sī hai āñkhoñ kī raushnī merī

vo kyā ga.e ki ga.ī saath zindagī merī

tirī ḳhushī se to baḌh kar nahīñ ḳhushī merī

tirī ḳhushī hī pe sadqe hai zindagī merī

banā rahā thā maiñ tasvīr ġham ke māroñ kī

ye kyā huā ki vo tasvīr ban ga.ī merī

zamāna kitnā hai mānūs merī hālat se

badal badal ke kahānī likhī ga.ī merī

vo kyā nibhā.eñge ab ḳhaak dard kā rishta

unheñ to lagtī hai sūrat bhī ajnabī merī

sabhī the Duube hue apne jām-o-sāġhar meñ

koī to dekhtā āñkhoñ kī tishnagī merī

ḳhayāl aap kā aaya to bhar ga.iiñ āñkheñ

hayāt kitnī hai hassās aaj bhī merī

abhī se aa.ina kyoñ rakh diyā mire aage

abhī to vaqt ne dekhī nahīñ chhabī merī

maiñ dekhtā rahā āñkhoñ se apnī barbādī

kisī ne luuT lī duniyā se har ḳhushī merī

chalo ḳhayāl to aaya unheñ kabhī merā

ye aur baat ki hasrat nikal ga.ī merī

maiñ is fareb meñ jiitā rahā 'sahar' ab tak

ki un ke vāste sab kuchh hai zindagī merī

bujhi bujhi si hai aankhon ki raushni meri

wo kya gae ki gai sath zindagi meri

teri KHushi se to baDh kar nahin KHushi meri

teri KHushi hi pe sadqe hai zindagi meri

bana raha tha main taswir gham ke maron ki

ye kya hua ki wo taswir ban gai meri

zamana kitna hai manus meri haalat se

badal badal ke kahani likhi gai meri

wo kya nibhaenge ab KHak dard ka rishta

unhen to lagti hai surat bhi ajnabi meri

sabhi the Dube hue apne jam-o-saghar mein

koi to dekhta aankhon ki tishnagi meri

KHayal aap ka aaya to bhar gain aankhen

hayat kitni hai hassas aaj bhi meri

abhi se aaina kyon rakh diya mere aage

abhi to waqt ne dekhi nahin chhabi meri

main dekhta raha aankhon se apni barbaadi

kisi ne luT li duniya se har KHushi meri

chalo KHayal to aaya unhen kabhi mera

ye aur baat ki hasrat nikal gai meri

main is fareb mein jita raha 'sahar' ab tak

ki un ke waste sab kuchh hai zindagi meri