bujhi hai aag magar is qadar ziyaada nahin

bujhī hai aag magar is qadar ziyāda nahīñ

dobāra milne kā imkān hai irāda nahīñ

kiyā hai vaqt ne yuuñ taar taar pairāhan

barahnagī ke sivā jism par labāda nahīñ

tirā ḳhayāl hai tanhā.iyāñ haiñ aur maiñ huuñ

mire nasīb meñ ab vasl kā i.aada nahīñ

milā bhī vo to kahāñ us kā naam likkheñge

kitāb-e-zīst kā koī varaq bhī saada nahīñ

na zaat meñ koī manzil na kā.enāt meñ hai

safar karūñ to kahāñ koī merā jaada nahīñ

havā ke saath hī shāyad badal ga.ī duniyā

ki jaam jaam nahīñ aur baada baada nahīñ

ḳhud apne saa.e meñ hī baiThnā paḌā 'nāsir'

koī shajar mire raste meñ īstāda nahīñ

bujhi hai aag magar is qadar ziyaada nahin

dobara milne ka imkan hai irada nahin

kiya hai waqt ne yun tar tar pairahan

barahnagi ke siwa jism par labaada nahin

tera KHayal hai tanhaiyan hain aur main hun

mere nasib mein ab wasl ka iada nahin

mila bhi wo to kahan us ka nam likkhenge

kitab-e-zist ka koi waraq bhi sada nahin

na zat mein koi manzil na kaenat mein hai

safar karun to kahan koi mera jada nahin

hawa ke sath hi shayad badal gai duniya

ki jam jam nahin aur baada baada nahin

KHud apne sae mein hi baiThna paDa 'nasir'

koi shajar mere raste mein istada nahin