bujhi hai dhup rahmat ki ghaTa aawaz deti hai

bujhī hai dhuup rahmat kī ghaTā āvāz detī hai

suno rahmān ko ḳhalq-e-ḳhudā āvāz detī hai

bahut muḳhlis hai sāda-dil hai sab ko jaan se pyārā

vo markaz par hai us ko har dishā āvāz detī hai

sitam sah kar bhī jo īmān pe qaa.em raheñ un kī

zabāneñ kaT bhī jaa.eñ to vafā āvāz detī hai

badan meñ nuur hai jis kā vahī āgāh kartā hai

zarā sī bhuul ho to aatmā āvāz detī hai

dhuāñ aisā ki āñkheñ kholnā mushkil huā jaa.e

lahū kī aag bhaḌkī hai havā āvāz detī hai

yahāñ par raushnī vaale bhī aa kar sahm jaate haiñ

daraḳhtoñ par siyāhī hai balā āvāz detī hai

adab kī paiñtare-bāzī se dil uktā gayā 'pāras'

ta.alluq munqata.a kar luuñ anā āvāz detī hai

bujhi hai dhup rahmat ki ghaTa aawaz deti hai

suno rahman ko KHalq-e-KHuda aawaz deti hai

bahut muKHlis hai sada-dil hai sab ko jaan se pyara

wo markaz par hai us ko har disha aawaz deti hai

sitam sah kar bhi jo iman pe qaem rahen un ki

zabanen kaT bhi jaen to wafa aawaz deti hai

badan mein nur hai jis ka wahi aagah karta hai

zara si bhul ho to aatma aawaz deti hai

dhuan aisa ki aankhen kholna mushkil hua jae

lahu ki aag bhaDki hai hawa aawaz deti hai

yahan par raushni wale bhi aa kar sahm jate hain

daraKHton par siyahi hai bala aawaz deti hai

adab ki paintare-bazi se dil ukta gaya 'paras'

talluq munqata kar lun ana aawaz deti hai