buland hausle aali janab rakhte hain

buland hausle aalī janāb rakhte haiñ

ham apnī palkoñ pe raushan se ḳhvāb rakhte haiñ

hazīmatoñ kā kahīñ bhī to indirāj nahīñ

har ik varaq na.ī faT.hoñ ke baab rakhte haiñ

ham apnī pyaas pe rakhte haiñ logo zabt-e-azīm

pata hai ḳhvāb ke sahrā sarāb rakhte haiñ

kabhī darāz na ham ne kiyā hai dast-e-talab

ki fazl-e-rab pe yaqīñ be-hisāb rakhte haiñ

ho aarzū jinheñ auj-e-falak ko chhūne kī

amal par apne kaḌā ehtisāb rakhte haiñ

sitam na toḌ ra.ī.yat pe vaqt ke hākim

ye apne pahlū meñ ik inqalāb rakhte haiñ

maiñ apne fe.al-o-amal par kharī rahī 'mīnā'

amal kasauTī pe ham be-hijāb rakhte haiñ

buland hausle aali janab rakhte hain

hum apni palkon pe raushan se KHwab rakhte hain

hazimaton ka kahin bhi to indiraj nahin

har ek waraq nai faThon ke bab rakhte hain

hum apni pyas pe rakhte hain logo zabt-e-azim

pata hai KHwab ke sahra sarab rakhte hain

kabhi daraaz na hum ne kiya hai dast-e-talab

ki fazl-e-rab pe yaqin be-hisab rakhte hain

ho aarzu jinhen auj-e-falak ko chhune ki

amal par apne kaDa ehtisab rakhte hain

sitam na toD raiyat pe waqt ke hakim

ye apne pahlu mein ek inqalab rakhte hain

main apne feal-o-amal par khari rahi 'mina'

amal kasauTi pe hum be-hijab rakhte hain