buland itna ghubar-e-karwan rakhte to achchha tha

buland itnā ġhubār-e-kārvāñ rakhte to achchhā thā

muqābil kahkashāñ ke kahkashāñ rakhte to achchhā thā

kahīñ shabnam kī be-qadrī kahīñ sabze kī pāmālī

chaman se duur apnā āshiyāñ rakhte to achchhā thā

agar ye āstān-e-yār par sajda nahīñ achchhā

to phir ai dil jabīñ apnī kahāñ rakhte to achchhā thā

sar-e-mai-ḳhāna āḳhir sāya-e-abr-e-siyah kab tak

saroñ par sāya-e-pīr-e-muġhāñ rakhte to achchhā thā

shuā-e-mahr shabnam kī baqā kyā chhīn saktī thī

ye qatre ḳhud meñ zarf-e-be-karāñ rakhte to achchhā thā

jigar ahl-e-havas kā chiir dete tanz ke nashtar

zabāñ par tum hamārī dāstāñ rakhte to achchhā thā

nazar aatā 'musavvir' ye bhī ruḳh tasvīr-e-gulshan kā

numāyāñ is meñ kuchh rang-e-ḳhizāñ rakhte to achchhā thā

buland itna ghubar-e-karwan rakhte to achchha tha

muqabil kahkashan ke kahkashan rakhte to achchha tha

kahin shabnam ki be-qadri kahin sabze ki pamali

chaman se dur apna aashiyan rakhte to achchha tha

agar ye aastan-e-yar par sajda nahin achchha

to phir ai dil jabin apni kahan rakhte to achchha tha

sar-e-mai-KHana aaKHir saya-e-abr-e-siyah kab tak

saron par saya-e-pir-e-mughan rakhte to achchha tha

shua-e-mahr shabnam ki baqa kya chhin sakti thi

ye qatre KHud mein zarf-e-be-karan rakhte to achchha tha

jigar ahl-e-hawas ka chir dete tanz ke nashtar

zaban par tum hamari dastan rakhte to achchha tha

nazar aata 'musawwir' ye bhi ruKH taswir-e-gulshan ka

numayan is mein kuchh rang-e-KHizan rakhte to achchha tha