بلندی پستی فقط اپنی عمر ڈھلنے تک

بلندی پستی فقط اپنی عمر ڈھلنے تک

ہے کار جہد مسلسل تو سانس چلنے تک

جلا کے دل جسے پہنچائی روشنی شب بھر

وہ جا چکا تھا بہت دور دن نکلنے تک

جنازہ اٹھ گیا عزت کا جب مرے گھر سے

ہے اتنا باقی فقط منہ پہ خاک ملنے تک

جو آستین میں پلتے رہے پنپتے رہے

چلیں گے چال وہ ہر بار سر کچلنے تک

بھلے ہی آج کی محنت کا ہو سنہرا کل

کسے ہے صبر مگر وقت کے بدلنے تک

ابھی سے راہ پکڑ خوف کر کہ وقت قضا

نہ مل سکے گا بہانہ کوئی سنبھلنے تک

سراغ ذات سے ادراک ذات تک اشرفؔ

سفر کٹھن ہی رہا مشکلوں کے ٹلنے تک