bulandi pasti faqat apni umr Dhalne tak

bulandī pastī faqat apnī 'umr Dhalne tak

hai kār-e-jehd-e-musalsal to saañs chalne tak

jalā ke dil jise pahuñchā.ī raushnī shab-bhar

vo jā chukā thā bahut duur din nikalne tak

janāza uTh gayā 'izzat kā jab mire ghar se

hai itnā baaqī faqat muñh pe ḳhaak malne tak

jo āstīn meñ palte rahe panapte rahe

chaleñge chaal vo har baar sar kuchalne tak

bhale hī aaj kī mehnat kā ho sunahrā kal

kise hai sabr magar vaqt ke badalne tak

abhī se raah pakaḌ ḳhauf kar ki vaqt-e-qazā

na mil sakegā bahāna koī sañbhalne tak

surāġh-e-zāt se idrāk-e-zāt tak 'ashraf'

safar kaThin hī rahā mushkiloñ ke Talne tak

bulandi pasti faqat apni 'umr Dhalne tak

hai kar-e-jehd-e-musalsal to sans chalne tak

jala ke dil jise pahunchai raushni shab-bhar

wo ja chuka tha bahut dur din nikalne tak

janaza uTh gaya 'izzat ka jab mere ghar se

hai itna baqi faqat munh pe KHak malne tak

jo aastin mein palte rahe panapte rahe

chalenge chaal wo har bar sar kuchalne tak

bhale hi aaj ki mehnat ka ho sunahra kal

kise hai sabr magar waqt ke badalne tak

abhi se rah pakaD KHauf kar ki waqt-e-qaza

na mil sakega bahana koi sanbhalne tak

suragh-e-zat se idrak-e-zat tak 'ashraf'

safar kaThin hi raha mushkilon ke Talne tak