bulandiyon se wo be-dagh nur ubhar aae

bulandiyoñ se vo be-dāġh nuur ubhar aa.e

hazār rañg tahī vus.atoñ meñ bhar aa.e

khile nigāh kī shāḳhoñ pe intizār ke phuul

havā meñ uḌte hue bādbāñ nazar aa.e

laboñ se bichhḌe hue qahqahe tirī mānind

ruteñ guzar ga.iiñ lekin na lauT kar aa.e

bujhī bujhī huī āñkheñ bhañvar bhañvar chehre

jab āftāb kī lau bujh rahī thī ghar aa.e

buland-o-past pahāḌoñ ke silsiloñ kī tarah

ham apne aap ko bhī muntashir nazar aa.e

nadī nasheb-numā uljhanoñ meñ Duub ga.ī

nihāñ sukūt tah-e-āb se ubhar aa.e

bulandiyon se wo be-dagh nur ubhar aae

hazar rang tahi wusaton mein bhar aae

khile nigah ki shaKHon pe intizar ke phul

hawa mein uDte hue baadban nazar aae

labon se bichhDe hue qahqahe teri manind

ruten guzar gain lekin na lauT kar aae

bujhi bujhi hui aankhen bhanwar bhanwar chehre

jab aaftab ki lau bujh rahi thi ghar aae

buland-o-past pahaDon ke silsilon ki tarah

hum apne aap ko bhi muntashir nazar aae

nadi nasheb-numa uljhanon mein Dub gai

nihan sukut tah-e-ab se ubhar aae