bulbul bajae apne tujhe ham-nawa se bahs

bulbul bajā.e apne tujhe ham-navā se bahs

vāshud meñ gul kī mahz ġhalat hai sabā se bahs

ā.īne ko na chāhiye āshiq ke dil ke saath

bar-aks apnī shakl ke rū-e-safā se bahs

ab to ġhurūr-e-husn hai aisā butāñ tumheñ

mutlaq mahall-e-ḳhauf nahīñ hai ḳhudā se bahs

mab.has se us maqām ke ḳhārij hai daḳhl-e-ġhair

jab āshnā ko aan paḌe āshnā se bahs

bulbul hazār naġhma-sarā ho.e baaġh meñ

kab kar sake hai nāla-e-dil kī sadā se bahs

daanā na us ko samjhiye jo ġhair ḳhāmushī

dil ḳhasta ho falak ke kare āsiyā se bahs

kab sham.a tere husn ke sho.ale ke rū-ba-rū

mahfil meñ kar sake kam-o-besh-e-ziyā se bahs

tausan ne terī nāzukī gulshan meñ ḳhatm kī

aaj āb-o-rañg-e-gul kī havas par havā se bahs

gulshan meñ chaak pairahan-e-gul kiyā 'muhib'

bulbul ne kar ke us but-e-gulgūñ-qabā se bahs

bulbul bajae apne tujhe ham-nawa se bahs

washud mein gul ki mahz ghalat hai saba se bahs

aaine ko na chahiye aashiq ke dil ke sath

bar-aks apni shakl ke ru-e-safa se bahs

ab to ghurur-e-husn hai aisa butan tumhein

mutlaq mahall-e-KHauf nahin hai KHuda se bahs

mabhas se us maqam ke KHarij hai daKHl-e-ghair

jab aashna ko aan paDe aashna se bahs

bulbul hazar naghma-sara hoe bagh mein

kab kar sake hai nala-e-dil ki sada se bahs

dana na us ko samjhiye jo ghair KHamushi

dil KHasta ho falak ke kare aasiya se bahs

kab shama tere husn ke shoale ke ru-ba-ru

mahfil mein kar sake kam-o-besh-e-ziya se bahs

tausan ne teri nazuki gulshan mein KHatm ki

aaj aab-o-rang-e-gul ki hawas par hawa se bahs

gulshan mein chaak pairahan-e-gul kiya 'muhib'

bulbul ne kar ke us but-e-gulgun-qaba se bahs