bulbul ka haal dekh chuka hun chaman se dur

bulbul kā haal dekh chukā huuñ chaman se duur

aa.e na mujh ko maut ilāhī vatan se duur

haañ ik nazar idhar bhī zarā ahl-e-anjuman

baiThā hai pā-shikasta koī anjuman se duur

ummīd-e-iltifāt bañdhāte ho kis liye

jā.ūñ kahāñ maiñ sāya-e-charḳh-e-kuhan se duur

koī mizāj-dāñ hai na koī sharīk-e-dard

huuñ ḳhitta-e-adam ke qarīb aur vatan se duur

parvardagān-e-nāz zarā ye bhī soch leñ

dasht-e-basīt itnā nahīñ hai chaman se duur

kis se kahūñ maiñ dil kī yahāñ kaun hai mirā

ġhurbat ne lā ke chhoḌ diyā hai vatan se duur

jab se mirā nasīb bigaḌtā chalā gayā

hotā chalā gayā maiñ hudūd-e-vatan se duur

'bismil' vo vaqt haa.e vo jannat-badosh vaqt

miltā hai koī ahl-e-vatan jab vatan se duur

bulbul ka haal dekh chuka hun chaman se dur

aae na mujh ko maut ilahi watan se dur

han ek nazar idhar bhi zara ahl-e-anjuman

baiTha hai pa-shikasta koi anjuman se dur

ummid-e-iltifat bandhate ho kis liye

jaun kahan main saya-e-charKH-e-kuhan se dur

koi mizaj-dan hai na koi sharik-e-dard

hun KHitta-e-adam ke qarib aur watan se dur

parwardagan-e-naz zara ye bhi soch len

dasht-e-basit itna nahin hai chaman se dur

kis se kahun main dil ki yahan kaun hai mera

ghurbat ne la ke chhoD diya hai watan se dur

jab se mera nasib bigaDta chala gaya

hota chala gaya main hudud-e-watan se dur

'bismil' wo waqt hae wo jannat-badosh waqt

milta hai koi ahl-e-watan jab watan se dur