bulbul ke naghme KHushbu ke charche hawa hue

bulbul ke naġhme ḳhushbū ke charche havā hue

mausam badal gayā hai vo jab se judā hue

milte nahīñ haiñ phūloñ meñ ab titliyoñ ke rang

bachpan meñ jaane soch ke kyā ham fidā hue

tum ko kamān khīñchnā aaya na aaj tak

tarkash meñ jitne tiir the saare ḳhatā hue

ham ko to ek ek qasam apnī yaad hai

gin ke batāo va.ade jo tum se vafā hue

vaqt-e-duā hai māñgo duā kārvāñ kī ḳhair

vāqif nahīñ jo raah se vo rahnumā hue

ḳhush aa.egā na tum ko sanam pūjnā kabhī

patthar tumhāre shahr ke saare ḳhudā hue

manzil ke jab nishāñ nazar aane lage 'jamāl'

har har qadam pe shukr ke sajde adā hue

bulbul ke naghme KHushbu ke charche hawa hue

mausam badal gaya hai wo jab se juda hue

milte nahin hain phulon mein ab titliyon ke rang

bachpan mein jaane soch ke kya hum fida hue

tum ko kaman khinchna aaya na aaj tak

tarkash mein jitne tir the sare KHata hue

hum ko to ek ek qasam apni yaad hai

gin ke batao wade jo tum se wafa hue

waqt-e-dua hai mango dua karwan ki KHair

waqif nahin jo rah se wo rahnuma hue

KHush aaega na tum ko sanam pujna kabhi

patthar tumhaare shahr ke sare KHuda hue

manzil ke jab nishan nazar aane lage 'jamal'

har har qadam pe shukr ke sajde ada hue