bulwata hai aqab se mera qafila mujhe

bulvātā hai aqab se mirā qāfila mujhe

kaisā milā hai tund-varī kā sila mujhe

furqat ke din guzārnā yuuñ to muhāl thā

ik terī yaad ne hī diyā hausla mujhe

ye aur baat hai ki merā zarf tañg thā

apnī taraf se tū ne to sab kuchh diyā mujhe

jab gardish-e-falak se na kuchh baat ban sakī

duniyā-e-rañg-o-bū kā banāyā ḳhudā mujhe

go farsh par huuñ phir bhī tasavvur meñ arsh hai

dekhā tirā ḳhayāl kahāñ le gayā mujhe

tere karam kā zarra-navāzī kā shukriya

duniyā bhī kah rahī hai qatīl-e-jafā mujhe

'bismil' kī ārzūeñ to pāmāl kar chuke

ab de rahe ho hasula-e-mudd.ā mujhe

bulwata hai aqab se mera qafila mujhe

kaisa mila hai tund-wari ka sila mujhe

furqat ke din guzarna yun to muhaal tha

ek teri yaad ne hi diya hausla mujhe

ye aur baat hai ki mera zarf tang tha

apni taraf se tu ne to sab kuchh diya mujhe

jab gardish-e-falak se na kuchh baat ban saki

duniya-e-rang-o-bu ka banaya KHuda mujhe

go farsh par hun phir bhi tasawwur mein arsh hai

dekha tera KHayal kahan le gaya mujhe

tere karam ka zarra-nawazi ka shukriya

duniya bhi kah rahi hai qatil-e-jafa mujhe

'bismil' ki aarzuen to pamal kar chuke

ab de rahe ho hasula-e-mudda mujhe