buniyaad husn-o-ishq ki pahle rakhi gai

buniyād husn-o-ishq kī pahle rakhī ga.ī

phir bazm-e-kā.enāt kī ta.amīr kī ga.ī

nākāmiyoñ ke baad bhī hai hausla buland

past-himmatī kī baat na ham se sunī ga.ī

kahne ko soz-e-ishq kī taqsīm thī magar

apne faroġh-e-husn kī tash.hīr kī ga.ī

le de ke ek sham.a hai vo bhī bujhī bujhī

marne ke baad bhī na mirī bekasī ga.ī

labbaik kah ke sū-e-haram ho gayā ravāñ

nutq-e-ḳhalīl se jise āvāz dī ga.ī

andāz dilrubā.ī ke jitne diye ga.e

utnī hī dil-dahī kī adā chhīn lī ga.ī

duniyā hai is fareb-e-samā.at meñ mubtalā

har ik ko hai gumāñ mujhe āvāz dī ga.ī

is tarah zindagī ke hue marhale tamām

har sang-e-ġham kī choT barābar sahī ga.ī

hamdard-o-ġham-gusār 'riyāzī' the qabr tak

ham-rāh mere sirf mirī bekasī ga.ī

buniyaad husn-o-ishq ki pahle rakhi gai

phir bazm-e-kaenat ki tamir ki gai

nakaamiyon ke baad bhi hai hausla buland

past-himmati ki baat na hum se suni gai

kahne ko soz-e-ishq ki taqsim thi magar

apne farogh-e-husn ki tashhir ki gai

le de ke ek shama hai wo bhi bujhi bujhi

marne ke baad bhi na meri bekasi gai

labbaik kah ke su-e-haram ho gaya rawan

nutq-e-KHalil se jise aawaz di gai

andaz dilrubai ke jitne diye gae

utni hi dil-dahi ki ada chhin li gai

duniya hai is fareb-e-samaat mein mubtala

har ek ko hai guman mujhe aawaz di gai

is tarah zindagi ke hue marhale tamam

har sang-e-gham ki choT barabar sahi gai

hamdard-o-gham-gusar 'riyazi' the qabr tak

ham-rah mere sirf meri bekasi gai