bura kahne se mujhko muddaa kya

burā kahne se mujh ko mudda'ā kyā

koī pūchhe to us ne ye kahā kyā

suneñ ham bhī ki dushman ne kahā kyā

bhalā jhūTī shikāyat kā gilā kyā

mohabbat kī ye bāteñ haiñ mirī jaañ

vafā kī ibtidā kyā intihā kyā

na kiije mujh se ġhairoñ kī shikāyat

bhulā dī aap ne tarz-e-vafā kyā

sunā hai qais thā lailā kā 'āshiq

mohabbat ho to phir achchhā burā kyā

javānī meñ ye nādānī kī bāteñ

vo kahte haiñ ki vā'de kī vafā kyā

vafā par jaan bhī qurbāñ hai apnī

jo pūchhe ham ko us kā pūchhnā kyā

khile the us ke lab ġhunche kī sūrat

batā to do ki 'shankar' se kahā kyā

bura kahne se mujh ko mudda'a kya

koi puchhe to us ne ye kaha kya

sunen hum bhi ki dushman ne kaha kya

bhala jhuTi shikayat ka gila kya

mohabbat ki ye baaten hain meri jaan

wafa ki ibtida kya intiha kya

na kije mujh se ghairon ki shikayat

bhula di aap ne tarz-e-wafa kya

suna hai qais tha laila ka 'ashiq

mohabbat ho to phir achchha bura kya

jawani mein ye nadani ki baaten

wo kahte hain ki wa'de ki wafa kya

wafa par jaan bhi qurban hai apni

jo puchhe hum ko us ka puchhna kya

khile the us ke lab ghunche ki surat

bata to do ki 'shankar' se kaha kya