bura lagta hai kyon shikwa hamara

burā lagtā hai kyoñ shikva hamārā

nahīñ shāyad koī rishta hamārā

hamāre haath kuchh aa.e na aa.e

magar hogā yahī shoba hamārā

kaho to jhuuT bhī thoḌā milā deñ

agar mīThā nahīñ lahja hamārā

tavāf-e-ishq hotā hai yahīñ par

bahut nazdīk hai ka.aba hamārā

tum aao to ise chhuTTī milegī

thakan se chuur hai takiya hamārā

are ham to muhāfiz haiñ tumhāre

tumheñ hai kis liye ḳhatra hamārā

ham aa.e the mohabbat kī galī meñ

badal kar rah gayā naqsha hamārā

tumhāre pattharoñ ko kyā huā hai

salāmat hai abhī shīsha hamārā

bura lagta hai kyon shikwa hamara

nahin shayad koi rishta hamara

hamare hath kuchh aae na aae

magar hoga yahi shoba hamara

kaho to jhuT bhi thoDa mila den

agar miTha nahin lahja hamara

tawaf-e-ishq hota hai yahin par

bahut nazdik hai kaba hamara

tum aao to ise chhuTTi milegi

thakan se chur hai takiya hamara

are hum to muhafiz hain tumhaare

tumhein hai kis liye KHatra hamara

hum aae the mohabbat ki gali mein

badal kar rah gaya naqsha hamara

tumhaare pattharon ko kya hua hai

salamat hai abhi shisha hamara