buri zaminon ke faslon ko miTate rahna

burī zamīnoñ ke fāsloñ ko miTāte rahnā

maiñ lauT ā.ūñgā mujh ko vāpas bulāte rahnā

ye gard-bādoñ kā mas.ala hai ki mashġhala hai

havā ke dāman pe dā.ere se banāte rahnā

tirī talab ke alāva apnā koī nahīñ hai

qarīb aa kar bhī kuchh na kuchh duur jaate rahnā

tumhārī āñkheñ to zindagī se bharī huī haiñ

hamāre jaisoñ kā hausla bhī baḌhāte rahnā

vo nazm jis ko paḌhā nahīñ thā jiyā thā ham ne

koī bhī rut ho bahār aa.ī sunāte rahnā

visāl kyā hai supurdagī kā kamāl kyā hai

baḌhā-chaḌhā kar saheliyoñ ko batāte rahnā

nazar bhī rakhnā mohalle vāloñ kī zindagī par

kabūtaroñ ko bhī dāna-vāna khilāte rahnā

bichhaḌnā chāho to apne dil kī nafī na karnā

yahī bahut hai jahāñ raho muskurāte rahnā

ye peḌ vo haiñ jo āsmānoñ ko saaya deñge

jo ho sake to duā ke paude lagāte rahnā

hamārī duniyā meñ hairatoñ kī bahut kamī hai

ye aag andar se bujh rahī hai jalāte rahnā

buri zaminon ke faslon ko miTate rahna

main lauT aaunga mujh ko wapas bulate rahna

ye gard-baadon ka masala hai ki mashghala hai

hawa ke daman pe daere se banate rahna

teri talab ke alawa apna koi nahin hai

qarib aa kar bhi kuchh na kuchh dur jate rahna

tumhaari aankhen to zindagi se bhari hui hain

hamare jaison ka hausla bhi baDhate rahna

wo nazm jis ko paDha nahin tha jiya tha hum ne

koi bhi rut ho bahaar aai sunate rahna

visal kya hai supurdagi ka kamal kya hai

baDha-chaDha kar saheliyon ko batate rahna

nazar bhi rakhna mohalle walon ki zindagi par

kabutaron ko bhi dana-wana khilate rahna

bichhaDna chaho to apne dil ki nafi na karna

yahi bahut hai jahan raho muskuraate rahna

ye peD wo hain jo aasmanon ko saya denge

jo ho sake to dua ke paude lagate rahna

hamari duniya mein hairaton ki bahut kami hai

ye aag andar se bujh rahi hai jalate rahna