but ke parde mein KHuda tha mujhe malum na tha

but ke parde meñ ḳhudā thā mujhe ma.alūm na thā

la.al patthar meñ chhupā thā mujhe ma.alūm na thā

DhūñDhtā maiñ rahā tasbīh ke dānoñ meñ use

zarre zarre meñ ḳhudā thā mujhe ma.alūm na thā

dil ne jā jā ke kiye lākhoñ tavāf-e-ka.aba

aur vo dil meñ chhupā thā mujhe ma.alūm na thā

ism-e-ahmad meñ ahad aap chhupā baiThā thā

miim kā parda paḌā thā mujhe ma.alūm na thā

le ke dil ġhair kā vo dil meñ mire aa baiThā

ghar meñ ik chor chhupā thā mujhe ma.alūm na thā

hosh aate hī ye muusā kī zabāñ se niklā

tuur pe nūr-e-ḳhudā thā mujhe ma.alūm na thā

kis ne chauñkā diyā kyoñ hosh meñ aaya 'asġhar'

be-ḳhudī meñ hī mazā thā mujhe ma.alūm na thā

but ke parde mein KHuda tha mujhe malum na tha

lal patthar mein chhupa tha mujhe malum na tha

DhunDhta main raha tasbih ke danon mein use

zarre zarre mein KHuda tha mujhe malum na tha

dil ne ja ja ke kiye lakhon tawaf-e-kaba

aur wo dil mein chhupa tha mujhe malum na tha

ism-e-ahmad mein ahad aap chhupa baiTha tha

mim ka parda paDa tha mujhe malum na tha

le ke dil ghair ka wo dil mein mere aa baiTha

ghar mein ek chor chhupa tha mujhe malum na tha

hosh aate hi ye musa ki zaban se nikla

tur pe nur-e-KHuda tha mujhe malum na tha

kis ne chaunka diya kyon hosh mein aaya 'asghar'

be-KHudi mein hi maza tha mujhe malum na tha