بت خدا کعبہ صنم خانہ بنا سکتی ہے

بت خدا کعبہ صنم خانہ بنا سکتی ہے

کیا سے کیا جرأت رندانہ بنا سکتی ہے

جسم کے خول میں حیواں کو چھپا کر تہذیب

شہر کے وسط میں ویرانہ بنا سکتی ہے

واقعہ شرط نہیں ہے کہ زبان مخلوق

بات بے بات بھی افسانہ بنا سکتی ہے

سعی سے بن نہیں سکتی ہے ازل کی بگڑی

یہ تری شان کریمانہ بنا سکتی ہے

ذہن کی سوچ پہ مبنی ہے بہشت و دوزخ

عقل یہ بستیاں روزانہ بنا سکتی ہے

خسروی اپنی جگہ خوب ہے لیکن دل کو

مطمئن طبع فقیرانہ بنا سکتی ہے

کس کو معلوم تھا شوکتؔ کہ اب اس عمر میں بھی

ایک لڑکی ہمیں دیوانہ بنا سکتی ہے