but-parasti ne kiya aashiq-e-yazdan mujhko

but-parastī ne kiyā āshiq-e-yazdāñ mujh ko

parda-e-kufr meñ hāsil huā īmāñ mujh ko

jab talak zulf-e-ruḳh-e-yār kā dīvāna rahā

piir samjhā kiye hindū-o-musalmāñ mujh ko

chāhiye pairahan-e-dāman-e-teġh o qātil

tere ḳhanjar kā hai darkār garebāñ mujh ko

ab dar-andāzī-e-aġhyār nahīñ chal saktī

ḳhuub pahchānte haiñ yaar ke darbāñ mujh ko

sharm-e-īzā se mire dil ko yaqīñ hai ai maut

muñh na dikhlā.egī sub.h-e-shab-e-hijrāñ mujh ko

ḳhāl-e-ruḳh ḳhizr-e-rah-e-kufr na hotā jo tirā

daam meñ lā hī chuke the ye musalmāñ mujh ko

chashm-e-ḳhuñ-ḳhvār kā āġhosh-e-mizha meñ hai ye qaul

zeb hai kahiye agar sher-e-niystāñ mujh ko

jis meñ kuchh hotī hai ummīd-e-visāl-e-mahbūb

itnī khaltī nahīñ vo gardish-e-daurāñ mujh ko

ye na ma.alūm thā is rañg se aa.egī bahār

tauba-e-mai ne kiyā saḳht pashemāñ mujh ko

ishq ne mansab-e-ushshāq jo taqsīm kiye

baaġh bulbul ko diyā kūcha-e-jānāñ mujh ko

sozish-e-dil se ye parvāne kī sūrat taḌpā

dekh kar rone lagī sham-e-shabistāñ mujh ko

mujh girāñ-bār ke mahshar meñ tuleñ jab a.amāl

na subuk kījiyo ai palla-e-mīzāñ mujh ko

kaun andesha-e-fardā kā malāl aaj kare

mausam-e-gul meñ nahīñ fikr-e-zamistāñ mujh ko

tere hote hue ai ġhairat-e-ḳhurshīd na luuñ

khoTe dāmoñ bhī mile gar mah-e-kan.āñ mujh ko

saf-kashī apnī dikhātā hai mujhe kyā ashrār

yaad hai us kī saf-ārā.ī-e-mizhgāñ mujh ko

lab-e-jāñ-baḳhsh sanam kā huuñ jo āshiq to log

jānte haiñ ḳhizar-e-chashma-e-haivāñ mujh ko

nā-tavāñ vo huuñ ajab kyā sifat pā-e-malaḳh

mor le jaa.e agar pesh-e-sulaimāñ mujh ko

mere zulmat-kade meñ laa.eñ jo raushan kar ke

kirm-e-shab aa.e nazar sham-e-shabistāñ mujh ko

sadd-e-bāb ab mirā aġhyār abas karte haiñ

nik.hat gul huuñ nahīñ kuchh ġham-e-darbāñ mujh ko

dil-jalā maiñ huuñ vo āshiq ki shab-e-hijr 'qalaq'

sham.a bhī rone lagī dekh garebāñ mujh ko

but-parasti ne kiya aashiq-e-yazdan mujh ko

parda-e-kufr mein hasil hua iman mujh ko

jab talak zulf-e-ruKH-e-yar ka diwana raha

pir samjha kiye hindu-o-musalman mujh ko

chahiye pairahan-e-daman-e-tegh o qatil

tere KHanjar ka hai darkar gareban mujh ko

ab dar-andazi-e-aghyar nahin chal sakti

KHub pahchante hain yar ke darban mujh ko

sharm-e-iza se mere dil ko yaqin hai ai maut

munh na dikhlaegi subh-e-shab-e-hijran mujh ko

KHal-e-ruKH KHizr-e-rah-e-kufr na hota jo tera

dam mein la hi chuke the ye musalman mujh ko

chashm-e-KHun-KHwar ka aaghosh-e-mizha mein hai ye qaul

zeb hai kahiye agar sher-e-niystan mujh ko

jis mein kuchh hoti hai ummid-e-visal-e-mahbub

itni khalti nahin wo gardish-e-dauran mujh ko

ye na malum tha is rang se aaegi bahaar

tauba-e-mai ne kiya saKHt pasheman mujh ko

ishq ne mansab-e-ushshaq jo taqsim kiye

bagh bulbul ko diya kucha-e-jaanan mujh ko

sozish-e-dil se ye parwane ki surat taDpa

dekh kar rone lagi sham-e-shabistan mujh ko

mujh giran-bar ke mahshar mein tulen jab aamal

na subuk kijiyo ai palla-e-mizan mujh ko

kaun andesha-e-farda ka malal aaj kare

mausam-e-gul mein nahin fikr-e-zamistan mujh ko

tere hote hue ai ghairat-e-KHurshid na lun

khoTe damon bhi mile gar mah-e-kanan mujh ko

saf-kashi apni dikhata hai mujhe kya ashrar

yaad hai us ki saf-arai-e-mizhgan mujh ko

lab-e-jaan-baKHsh sanam ka hun jo aashiq to log

jaante hain KHizar-e-chashma-e-haiwan mujh ko

na-tawan wo hun ajab kya sifat pa-e-malaKH

mor le jae agar pesh-e-sulaiman mujh ko

mere zulmat-kade mein laen jo raushan kar ke

kirm-e-shab aae nazar sham-e-shabistan mujh ko

sadd-e-bab ab mera aghyar abas karte hain

nikhat gul hun nahin kuchh gham-e-darban mujh ko

dil-jala main hun wo aashiq ki shab-e-hijr 'qalaq'

shama bhi rone lagi dekh gareban mujh ko