but-parasti pe jo apna dil-e-nashad aaya

but-parastī pe jo apnā dil-e-nāshād aayā

sañg-rezo meñ nazar husn-e-ḳhudā-dād aayā

merī dar tak jo kabhī vo sitam-ījād kiyā

paañv chaukhaT pe na rakhe the ki ghar yaad aayā

'arsh se aa ke farishtoñ ne sañbhālā mujh ko

girte girte jo tirā naam mujhe yaad aayā

ā.īna taaq se utrā hī ḳhudā ḳhair kare

nāz-o-andāz sikhāne unheñ ustād aayā

baa'd marne ke lahad meñ jo lagā hone 'azāb

yaad kyā kyā na mujhe vo sitam-ījād aayā

to amaañ dahr meñ ulfat se huā maiñ paidā

'ishq hamrāh mire sūrat-e-ham-zād aayā

dil meñ go laakh the shikve magar un ke aage

aise kho.e ga.e kuchh bhī na hameñ yaad aayā

be-sutūñ par jo kabhī jā.ūñ maiñ vo 'āshiq huuñ

naqsh-e-shīrīñ se sadā aa.ī ki farhād aayā

is qadar ḳhauf-e-asīrī hai mire gulshan meñ

apne saa.e ko samajhtā huuñ ki sayyād aayā

merī vahshat se na un ko kahīñ saudā ho jaa.e

pūchhte phirte haiñ ik ek se fassād aayā

qumriyoñ ke liye suulī se sivā sarv huā

sair-e-gulshan ko jo vo ġhairat-e-shamshād aayā

oḌh kar surḳh dupaTTa mujhe maarā us ne

ban ke mirrīḳh mirī qatl ko jallād aayā

arġhavāñ zār-e-chaman khet banā kushtoñ kā

aaj gulzār meñ aisā koī jallād aayā

aur to kaun musībat meñ ḳhabar letā hai

jab kaleja bhī na muñh ko dam-e-fariyād aayā

merī vahshat ne mire ghar ko banāyā bāzār

kabhī fassād sudhārā kabhī haddād aayā

'kaif' kā haal 'ajab thā ġham-e-tanhā.ī se

bach ga.e jaan jo us dam vo parī-zād aayā

but-parasti pe jo apna dil-e-nashad aaya

sang-rezo mein nazar husn-e-KHuda-dad aaya

meri dar tak jo kabhi wo sitam-ijad kiya

panw chaukhaT pe na rakhe the ki ghar yaad aaya

'arsh se aa ke farishton ne sanbhaala mujh ko

girte girte jo tera nam mujhe yaad aaya

aaina taq se utra hi KHuda KHair kare

naz-o-andaz sikhane unhen ustad aaya

ba'd marne ke lahad mein jo laga hone 'azab

yaad kya kya na mujhe wo sitam-ijad aaya

to aman dahr mein ulfat se hua main paida

'ishq hamrah mere surat-e-ham-zad aaya

dil mein go lakh the shikwe magar un ke aage

aise khoe gae kuchh bhi na hamein yaad aaya

be-sutun par jo kabhi jaun main wo 'ashiq hun

naqsh-e-shirin se sada aai ki farhad aaya

is qadar KHauf-e-asiri hai mere gulshan mein

apne sae ko samajhta hun ki sayyaad aaya

meri wahshat se na un ko kahin sauda ho jae

puchhte phirte hain ek ek se fassad aaya

qumriyon ke liye suli se siwa sarw hua

sair-e-gulshan ko jo wo ghairat-e-shamshad aaya

oDh kar surKH dupaTTa mujhe mara us ne

ban ke mirriKH meri qatl ko jallad aaya

arghawan zar-e-chaman khet bana kushton ka

aaj gulzar mein aisa koi jallad aaya

aur to kaun musibat mein KHabar leta hai

jab kaleja bhi na munh ko dam-e-fariyaad aaya

meri wahshat ne mere ghar ko banaya bazar

kabhi fassad sudhaara kabhi haddad aaya

'kaif' ka haal 'ajab tha gham-e-tanhai se

bach gae jaan jo us dam wo pari-zad aaya