buto kuchh had bhi hai jaur-o-jafa ki

buto kuchh had bhī hai jaur-o-jafā kī

hai āḳhir intihā har ibtidā kī

jagah kyā ho in āñkhoñ meñ hayā kī

bharī ho jin meñ shoḳhī intihā kī

shab-e-ġham aane meñ kartī hai ġhamze

adā bhātī nahīñ mujh ko qazā kī

mirā dil le ke ab mujh par ye zulm aah

daġhā kī tū ne o zālim daġhā kī

mazā hai mai-kashī kā abr meñ aaj

falak parchhā.ī hai rahmat ḳhudā kī

butoñ kī mehrbānī kyā karam kyā

ināyat chāhiye mujh par ḳhudā kī

tujhe o bevafā chāhā huī chuuk

tujhe dil ne diyā maiñ ne ḳhatā kī

ye kyoñ uḌtā hai chehre kā mire rañg

huī kis shoḳh ko hājat hinā kī

vo leñge jaan bhī vaañ le ke ik din

ḳhabar thī ibtidā meñ intihā kī

chalā dil kūcha-e-gesū ko jis dam

duā kī paḌh ke dam radd-e-balā kī

ga.e the vo jahāñ ham DhūñDh lete

madad miltī jo un ke naqsh-e-pā kī

dil-e-muztar kī kuchh hālat na pūchho

taḌap bijlī meñ hai aaj intihā kī

jab aate haiñ chaḌhā jaate haiñ do phuul

vo turbat par 'fahīm'-e-mubtalā kī

buto kuchh had bhi hai jaur-o-jafa ki

hai aaKHir intiha har ibtida ki

jagah kya ho in aankhon mein haya ki

bhari ho jin mein shoKHi intiha ki

shab-e-gham aane mein karti hai ghamze

ada bhati nahin mujh ko qaza ki

mera dil le ke ab mujh par ye zulm aah

dagha ki tu ne o zalim dagha ki

maza hai mai-kashi ka abr mein aaj

falak parchhai hai rahmat KHuda ki

buton ki mehrbani kya karam kya

inayat chahiye mujh par KHuda ki

tujhe o bewafa chaha hui chuk

tujhe dil ne diya main ne KHata ki

ye kyon uDta hai chehre ka mere rang

hui kis shoKH ko hajat hina ki

wo lenge jaan bhi wan le ke ek din

KHabar thi ibtida mein intiha ki

chala dil kucha-e-gesu ko jis dam

dua ki paDh ke dam radd-e-bala ki

gae the wo jahan hum DhunDh lete

madad milti jo un ke naqsh-e-pa ki

dil-e-muztar ki kuchh haalat na puchho

taDap bijli mein hai aaj intiha ki

jab aate hain chaDha jate hain do phul

wo turbat par 'fahim'-e-mubtala ki