buton pe apni jo hum jaan den KHuda na kare

butoñ pe apnī jo ham jaan deñ ḳhudā na kare

ki un ko apnā ham īmān deñ ḳhudā na kare

vo bazm-e-ġhair meñ mujh se bigaḌ ke yuuñ bole

ki tujh ko haath se ham paan deñ ḳhudā na kare

vo apnā dekh ke saa.il mujhe ye kahte haiñ

ki tujh ko husn kī ham daan deñ ḳhudā na kare

kahā jo vasl ko un se jhiḌak ke yuuñ bole

ki tujh se vasl kī ham Thaan deñ ḳhudā na kare

ġharīb jaan ke 'sanjar' mujhe vo kahte haiñ

ki aise-vaisoñ pe ham jaan deñ ḳhudā na kare

buton pe apni jo hum jaan den KHuda na kare

ki un ko apna hum iman den KHuda na kare

wo bazm-e-ghair mein mujh se bigaD ke yun bole

ki tujh ko hath se hum pan den KHuda na kare

wo apna dekh ke sail mujhe ye kahte hain

ki tujh ko husn ki hum dan den KHuda na kare

kaha jo wasl ko un se jhiDak ke yun bole

ki tujh se wasl ki hum Than den KHuda na kare

gharib jaan ke 'sanjar' mujhe wo kahte hain

ki aise-waison pe hum jaan den KHuda na kare