buzurgon ki ye baaten hain koi jhuTla nahin sakta

buzurgoñ kī ye bāteñ haiñ koī jhuTlā nahīñ saktā

bharosa un pe jo kartā hai dhoka khā nahīñ saktā

ham apne dil pe us kī justujū kā bojh kyoñ Dāleñ

vo ik Duubā huā sūraj hai vāpas aa nahīñ saktā

bas ik Thokar sañbhalne kā sabaq us ko sikhātī hai

fahīm insāñ kabhī Thokar pe Thokar khā nahīñ saktā

nikal saktā nahīñ vo shaḳhs māyūsī ke daldal se

kabhī apnī tamannāoñ ko jo Thukrā nahīñ saktā

vahī badnām kar saktā hai jo ham-rāz hotā hai

magar maiñ is haqīqat ko use samjhā nahīñ saktā

zavāl aa.egā ik din husn par bhī husn kī devī

ye mat samjho khilā hai phuul jo murjhā nahīñ saktā

mujhe 'jāved' vo kis tarh apne saath rakh letā

maiñ patthar huuñ mujhe hiirā koī apnā nahīñ saktā

buzurgon ki ye baaten hain koi jhuTla nahin sakta

bharosa un pe jo karta hai dhoka kha nahin sakta

hum apne dil pe us ki justuju ka bojh kyon Dalen

wo ek Duba hua suraj hai wapas aa nahin sakta

bas ek Thokar sanbhalne ka sabaq us ko sikhati hai

fahim insan kabhi Thokar pe Thokar kha nahin sakta

nikal sakta nahin wo shaKHs mayusi ke daldal se

kabhi apni tamannaon ko jo Thukra nahin sakta

wahi badnam kar sakta hai jo ham-raaz hota hai

magar main is haqiqat ko use samjha nahin sakta

zawal aaega ek din husn par bhi husn ki dewi

ye mat samjho khila hai phul jo murjha nahin sakta

mujhe 'jawed' wo kis tarh apne sath rakh leta

main patthar hun mujhe hira koi apna nahin sakta