canwas par puri sachchai ke jab aate hain hum

canvas par puurī sachchā.ī ke jab aate haiñ ham

rahte haiñ manzar meñ yā tahlīl ho jaate haiñ ham

apnī parchhā.īñ kā karte haiñ ta'āqub 'umr bhar

aur apnā sāmnā karne se ghabrāte haiñ ham

zindagī kā thā jo sūraj TukḌe TukḌe ho gayā

saaya saaya raushnī ko DhūñDne jaate haiñ ham

aap ke andar hai jo ik saañp vo mujh meñ bhī hai

bas usī kā zahr dasht-e-jāñ meñ phailāte haiñ ham

ek misra ek fiqra taaza paḌhne ke liye

'ahd-e-hāzir kā kutub-ḳhāna uThā laate haiñ ham

ek kaalī nazm ik kaalī ġhazal ke vāste

kaḌve ras kī botaleñ kitnī hī pī jaate haiñ ham

kuchh nahīñ mā'lūm ham ko ye hameñ mā'lūm hai

baat ye kahne kī hai ye kah nahīñ paate haiñ ham

ik ġhubār-o-gard kā 'ālam hai 'vasfī' duur tak

sūkhtā jaatā hai dariyā Dūbte jaate haiñ ham

canwas par puri sachchai ke jab aate hain hum

rahte hain manzar mein ya tahlil ho jate hain hum

apni parchhain ka karte hain ta'aqub 'umr bhar

aur apna samna karne se ghabraate hain hum

zindagi ka tha jo suraj TukDe TukDe ho gaya

saya saya raushni ko DhunDne jate hain hum

aap ke andar hai jo ek sanp wo mujh mein bhi hai

bas usi ka zahr dasht-e-jaan mein phailate hain hum

ek misra ek fiqra taza paDhne ke liye

'ahd-e-hazir ka kutub-KHana uTha late hain hum

ek kali nazm ek kali ghazal ke waste

kaDwe ras ki botalen kitni hi pi jate hain hum

kuchh nahin ma'lum hum ko ye hamein ma'lum hai

baat ye kahne ki hai ye kah nahin pate hain hum

ek ghubar-o-gard ka 'alam hai 'wasfi' dur tak

sukhta jata hai dariya Dubte jate hain hum