soz-e-dua se saz-e-asar kaun le gaya

soz-e-duā se sāz-e-asar kaun le gayā

ik sang-e-dar se nisbat-e-sar kaun le gayā

har shai hai nā-tamām ye ehsās kyuuñ hai aaj

har 'aib se javāz-e-hunar kaun le gayā

kis ne mirī nigāh se parde uThā diye

ik ranj-e-āgahī ki idhar kaun le gayā

'arsa huā ke paañv ke nīche zamīñ nahīñ

vo naqsh-e-pā vo rāhguzar kaun le gayā

mere safīne mere lahū meñ nahā ga.e

mere sarāb ke vo bhañvar kaun le gayā

tāḳhīr-e-vaqt-e-dīd tirī barhamī kā Dar

kitnā hasīn Dar thā vo Dar kaun le gayā

hairāñ hai 'aql 'shāz' ki vahshat kidhar ga.ī

bastī udaas hai ki khañDar kaun le gayā

soz-e-dua se saz-e-asar kaun le gaya

ek sang-e-dar se nisbat-e-sar kaun le gaya

har shai hai na-tamam ye ehsas kyun hai aaj

har 'aib se jawaz-e-hunar kaun le gaya

kis ne meri nigah se parde uTha diye

ek ranj-e-agahi ki idhar kaun le gaya

'arsa hua ke panw ke niche zamin nahin

wo naqsh-e-pa wo rahguzar kaun le gaya

mere safine mere lahu mein naha gae

mere sarab ke wo bhanwar kaun le gaya

taKHir-e-waqt-e-did teri barhami ka Dar

kitna hasin Dar tha wo Dar kaun le gaya

hairan hai 'aql 'shaz' ki wahshat kidhar gai

basti udas hai ki khanDar kaun le gaya