chah pane ki nahin khone ka kuchh Dar bhi nahin

chaah paane kī nahīñ khone kā kuchh Dar bhī nahīñ

ġham judā.ī kā mujhe rattī barābar bhī nahīñ

jab se us kā ho gayā phir maiñ kahāñ baaqī rahā

log bāhar DhūñDte haiñ maiñ to andar bhī nahīñ

jī meñ aatā hai use bandī banā luuñ ḳhvāb meñ

mere nainoñ meñ magar ruktā vo pal-bhar bhī nahīñ

shohrateñ insān ko panchhī banā detī haiñ kyā

vo bhī uḌte haiñ havā meñ jin ke to par bhī nahīñ

jiite jī tamġhoñ se shāyad kuchh bhalā hotā magar

kyā kare dastār kā jab jism pe sar bhī nahīñ

kis qadar is daur kī rangīniyoñ meñ kho ga.e

ham ko ab aslāf ke paiġhām azbar bhī nahīñ

merī aamad se bhalā kyoñ aa.ina Darne lage

mere hāthoñ meñ to 'sāhil' koī patthar bhī nahīñ

chah pane ki nahin khone ka kuchh Dar bhi nahin

gham judai ka mujhe ratti barabar bhi nahin

jab se us ka ho gaya phir main kahan baqi raha

log bahar DhunDte hain main to andar bhi nahin

ji mein aata hai use bandi bana lun KHwab mein

mere nainon mein magar rukta wo pal-bhar bhi nahin

shohraten insan ko panchhi bana deti hain kya

wo bhi uDte hain hawa mein jin ke to par bhi nahin

jite ji tamghon se shayad kuchh bhala hota magar

kya kare dastar ka jab jism pe sar bhi nahin

kis qadar is daur ki ranginiyon mein kho gae

hum ko ab aslaf ke paigham azbar bhi nahin

meri aamad se bhala kyon aaina Darne lage

mere hathon mein to 'sahil' koi patthar bhi nahin