chaha yahi tha mir ka aazar khinchti

chāhā yahī thā 'mīr' kā āzār khīñchtī

sahrā meñ apne vāste dīvār khīñchtī

aayā thā merī or vo pyāse laboñ ke saath

bas meñ kahāñ thā mere ki inkār khīñchtī

mujh se chhuḌā ke haath vo jaane lagā thā kyoñ

ik baar gar vo kahtā to sau baar khīñchtī

kartā agar savāl ataa.ī visāl kā

tishna sī ārzū-e-talabgār khīñchtī

dil meñ chhupā ke baiTh gayā mausam-e-tarab

kaise maiñ apnā jazba-e-iz.hār khīñchtī

rakkhā hai us ne yaad mujhe ḳhvāb kī tarah

ai kaash maiñ bhī arsa-e-azkār khīñchtī

vo bhī guloñ kī ḳhushbūoñ ke sang kheltā

maiñ bhī badan kī shāḳh-e-samar-bār khīñchtī

jaadū thā us ke husn-e-talab ke hisār meñ

'māhīn' kaise shiddat-e-isrār khīñchtī

chaha yahi tha 'mir' ka aazar khinchti

sahra mein apne waste diwar khinchti

aaya tha meri or wo pyase labon ke sath

bas mein kahan tha mere ki inkar khinchti

mujh se chhuDa ke hath wo jaane laga tha kyon

ek bar gar wo kahta to sau bar khinchti

karta agar sawal atai visal ka

tishna si aarzu-e-talabgar khinchti

dil mein chhupa ke baiTh gaya mausam-e-tarab

kaise main apna jazba-e-izhaar khinchti

rakkha hai us ne yaad mujhe KHwab ki tarah

ai kash main bhi arsa-e-azkar khinchti

wo bhi gulon ki KHushbuon ke sang khelta

main bhi badan ki shaKH-e-samar-bar khinchti

jadu tha us ke husn-e-talab ke hisar mein

'mahin' kaise shiddat-e-israr khinchti