chahe be-nur hon aankhon se bhi KHush hote hain

chāhe be-nūr hoñ āñkhoñ se bhī ḳhush hote haiñ

ham to bū-jahl ke fatvoñ se bhī ḳhush hote haiñ

ye sajāvaT ke jo bāzār haiñ bekār nahīñ

hoñge kuchh log jo chehroñ se bhī ḳhush hote haiñ

har nayā lamha ta'āqub meñ hai tā'bīroñ kī

ham vo jaage haiñ jo ḳhvāboñ se bhī ḳhush hote haiñ

aise hī phuuT ke ro.egā koī un ke liye

log majbūr ke nāloñ se bhī ḳhush hote haiñ

ye jo har roz kā marnā hai musībat hai yahī

yaar ham jaise to zaḳhmoñ se bhī ḳhush hote haiñ

koī hai jo tirī auqāt batātā hai tujhe

ab to ham aa.ine vāloñ se bhī ḳhush hote haiñ

mushk vaale bhī chale aate haiñ bhūle-bhaTke

ye jo suufī haiñ ġhazāloñ se bhī ḳhush hote haiñ

chahe be-nur hon aankhon se bhi KHush hote hain

hum to bu-jahl ke fatwon se bhi KHush hote hain

ye sajawaT ke jo bazar hain bekar nahin

honge kuchh log jo chehron se bhi KHush hote hain

har naya lamha ta'aqub mein hai ta'biron ki

hum wo jage hain jo KHwabon se bhi KHush hote hain

aise hi phuT ke roega koi un ke liye

log majbur ke nalon se bhi KHush hote hain

ye jo har roz ka marna hai musibat hai yahi

yar hum jaise to zaKHmon se bhi KHush hote hain

koi hai jo teri auqat batata hai tujhe

ab to hum aaine walon se bhi KHush hote hain

mushk wale bhi chale aate hain bhule-bhaTke

ye jo sufi hain ghazalon se bhi KHush hote hain