chahe miTTi ka diya tha ye jalae rakkha

chāhe miTTī kā diyā thā ye jalā.e rakkhā

ḳhud se jo ahd kiyā thā so nibhā.e rakkhā

merī vābastagī-e-bāġh hai īmāñ merā

be-samar shāḳh ko siine se lagā.e rakkhā

qadd-o-qāmat kā ta.ayyun sar-e-sahrā kaisā

phir bhī sāyoñ hī ko me.aar banā.e rakkhā

maiñ ne ta.avīz samajh kar jise pahnā thā kabhī

jaane us naqsh ne kyoñ mujh ko Darā.e rakkhā

nā-rasā.ī ke samundar kī sadā.eñ sun kar

aur ik naqsh nayā ham ne banā.e rakkhā

harf kī dhuup agar sub.h-e-tamāzat na banī

apne hī jism ko dīvār banā.e rakkhā

maiñ kahāñ aur kahāñ shahr-e-qasīda yaaro

'sabr' kā nauha magar lab pe sajā.e rakkhā

chahe miTTi ka diya tha ye jalae rakkha

KHud se jo ahd kiya tha so nibhae rakkha

meri wabastagi-e-bagh hai iman mera

be-samar shaKH ko sine se lagae rakkha

qadd-o-qamat ka tayyun sar-e-sahra kaisa

phir bhi sayon hi ko mear banae rakkha

main ne tawiz samajh kar jise pahna tha kabhi

jaane us naqsh ne kyon mujh ko Darae rakkha

na-rasai ke samundar ki sadaen sun kar

aur ek naqsh naya hum ne banae rakkha

harf ki dhup agar subh-e-tamazat na bani

apne hi jism ko diwar banae rakkha

main kahan aur kahan shahr-e-qasida yaro

'sabr' ka nauha magar lab pe sajae rakkha