chaak-dar-chaak hai phulon ki qaba sunte hain

chāk-dar-chāk hai phūloñ kī qabā sunte haiñ

panja-kash aaj hai gulshan kī havā sunte haiñ

tum ne chheḌā to nahīñ sāz-e-tabassum apnā

tez hai dil ke dhaḌakne kī sadā sunte haiñ

jaane kab rāhguzar shauq kī hogī gul-posh

aaj guzre haiñ ka.ī ābla-pā sunte haiñ

aap ke va.ada-e-fardā kā yaqīñ hai lekin

ruuh farsā hai bahut dasht-e-vafā sunte haiñ

sham.a dil hī ki jalāo kī shab-e-tār kaTe

sar-ba-zānū hai charāġhoñ kī ziyā sunte haiñ

kyā ilāj-e-dil-e-bīmār kī sūrat na rahī

aaj hai chāragarī vaqf-e-duā sunte haiñ

naġhma-e-murġh-e-chaman ho ki ḳharosh-e-tūfāñ

ham to har saaz pe apnī hī sadā sunte haiñ

chaak-dar-chaak hai phulon ki qaba sunte hain

panja-kash aaj hai gulshan ki hawa sunte hain

tum ne chheDa to nahin saz-e-tabassum apna

tez hai dil ke dhaDakne ki sada sunte hain

jaane kab rahguzar shauq ki hogi gul-posh

aaj guzre hain kai aabla-pa sunte hain

aap ke wada-e-farda ka yaqin hai lekin

ruh farsa hai bahut dasht-e-wafa sunte hain

shama dil hi ki jalao ki shab-e-tar kaTe

sar-ba-zanu hai charaghon ki ziya sunte hain

kya ilaj-e-dil-e-bimar ki surat na rahi

aaj hai chaaragari waqf-e-dua sunte hain

naghma-e-murgh-e-chaman ho ki KHarosh-e-tufan

hum to har saz pe apni hi sada sunte hain