chaak-dil ho koi ya KHak-basar kya hoga

chāk-dil ho koī yā ḳhāk-basar kyā hogā

jis ko ehsās nahīñ us ko asar kyā hogā

hāsil-e-dard ba-juz dīda-e-tar kyā hogā

nahīñ mālūm yahāñ apnā guzar kyā hogā

pahle āġhāz-e-shab-e-ġham to samajh meñ aa.e

baad kī baat hai hangām-e-sahar kyā hogā

dekh kar rañg-e-jahān-e-guzarāñ hairāñ huuñ

jab ye aalam hai idhar kā to udhar kyā hogā

zindagī zauq-e-safar tark nahīñ kar saktī

soch kar kyā karūñ anjām-e-safar kyā hogā

aap to ḳhair se barsāt kā sūraj Thahre

ham ġharīboñ kī umīdoñ kā magar kyā hogā

is se to ruuh sañvartī hai nazar bantī hai

koī jalva bhī tirā sarf-e-nazar kyā hogā

duur tak vaqt kī rāhoñ meñ añdherā hai abhī

dil na sulge to charāġhoñ kā asar kyā hogā

zindagī aur sukūñ ek khulā dhokā hai

saañs jab tak hai kashākash se mafar kyā hogā

ḳhuun dil kā na ho ta.amīr meñ jab tak shāmil

mo'atabar koī bhī andāz-e-nazar kyā hogā

vaqt ke saath chale jaate haiñ jaane vaale

sochte rahte haiñ sab zindagī bhar kyā hogā

'shauq' āzār-talab fitrat-e-dil hai apnī

laakh ham chāheñge ārām magar kyā hogā

chaak-dil ho koi ya KHak-basar kya hoga

jis ko ehsas nahin us ko asar kya hoga

hasil-e-dard ba-juz dida-e-tar kya hoga

nahin malum yahan apna guzar kya hoga

pahle aaghaz-e-shab-e-gham to samajh mein aae

baad ki baat hai hangam-e-sahar kya hoga

dekh kar rang-e-jahan-e-guzaran hairan hun

jab ye aalam hai idhar ka to udhar kya hoga

zindagi zauq-e-safar tark nahin kar sakti

soch kar kya karun anjam-e-safar kya hoga

aap to KHair se barsat ka suraj Thahre

hum gharibon ki umidon ka magar kya hoga

is se to ruh sanwarti hai nazar banti hai

koi jalwa bhi tera sarf-e-nazar kya hoga

dur tak waqt ki rahon mein andhera hai abhi

dil na sulge to charaghon ka asar kya hoga

zindagi aur sukun ek khula dhoka hai

sans jab tak hai kashakash se mafar kya hoga

KHun dil ka na ho tamir mein jab tak shamil

mo'atabar koi bhi andaz-e-nazar kya hoga

waqt ke sath chale jate hain jaane wale

sochte rahte hain sab zindagi bhar kya hoga

'shauq' aazar-talab fitrat-e-dil hai apni

lakh hum chahenge aaram magar kya hoga