chand hi nikla na baadal hi chhama-chham barsa

chāñd hī niklā na bādal hī chhamā-chham barsā

raat dil par ġham-e-dil sūrat-e-shabnam barsā

jaltī jaatī haiñ jaḌeñ sūkhte jaate haiñ shajar

ho jo taufīq to aañsū hī koī dam barsā

mere armān the barsāt ke bādal kī tarah

ġhunche shākī haiñ ki ye abr bahut kam barsā

pai-ba-pai aa.e sajal tāroñ ke mānind ḳhayāl

merī tanhā.ī pe shab husn jhamā-jham barsā

kitne nā-paid ujāloñ se kiyā hai ābād

vo añdherā jo mirī āñkhoñ pe paiham barsā

sard jhoñkoñ ne kahī suunī rutoñ se kyā baat

kin tamannāoñ kā ḳhuuñ shāḳhoñ se tham tham barsā

qarya qarya thī 'ziyā' hasrat-e-ābādī-e-dil

qarya qarya vahī vīrānī kā aalam barsā

chand hi nikla na baadal hi chhama-chham barsa

raat dil par gham-e-dil surat-e-shabnam barsa

jalti jati hain jaDen sukhte jate hain shajar

ho jo taufiq to aansu hi koi dam barsa

mere arman the barsat ke baadal ki tarah

ghunche shaki hain ki ye abr bahut kam barsa

pai-ba-pai aae sajal taron ke manind KHayal

meri tanhai pe shab husn jhama-jham barsa

kitne na-paid ujalon se kiya hai aabaad

wo andhera jo meri aankhon pe paiham barsa

sard jhonkon ne kahi suni ruton se kya baat

kin tamannaon ka KHun shaKHon se tham tham barsa

qarya qarya thi 'ziya' hasrat-e-abaadi-e-dil

qarya qarya wahi virani ka aalam barsa