chand kamre ki khiDki mein Thahra raha chandni raat jadu jagane lagi

chāñd kamre kī khiḌkī meñ Thahrā rahā chāñdnī raat jaadū jagāne lagī

chāñdnī mere bistar talak aa ga.ī aur āñkhoñ se nīñdeñ uḌāne lagī

yaad kī Diary maiñ ne kholī hai jab sūkhe phūloñ se ḳhushbū sī aane lagī

tez āñdhī sī chalne lagī dard kī aur ik ik varaq ko uḌāne lagī

khul rahe haiñ ḳhayāloñ ke sab bādbāñ kashtiyāñ sāhiloñ kī taraf haiñ rulī

nīlgūñ nīlgūñ sīna-e-āb par chāñdnī kī kiran chamchamāne lagī

mausam-e-gul ke mahke qadam aa ga.e Daalī Daalī dhanak rang āñchal uḌe

mere gaañv meñ chupke se aa.ī sabā yaad gulshan kī mujh ko satāne lagī

būḌhe pīpal kī chhāñv meñ TuuTā huā ik gharauñdā hai miTTī kā baaqī abhī

merī bachpan kī ik ik kahānī mujhe de ke āvāz vāpas bulāne lagī

merī sāñsoñ meñ mahkā kare hai koī dil kī dhaḌkan meñ dhaḌkā kare hai koī

aañkh kī putliyoñ meñ basā hai koī maiñ jo ghabrā ke palkeñ jhukāne lagī

aam kī mīThī ḳhushbū fazā meñ uḌī jaise kānoñ meñ shahnā.iyāñ baj uThīñ

jaise sājan kā aayā sandesa sakhī gorī hāthoñ meñ mehñdī rachāne lagī

maiñ ki gītoñ kī jogan huuñ 'husnā' sadā fan ke sahrā meñ dar-dar bhaTaktī phirūñ

mujh ko manzil kī rahtī hai har pal lagan ik jalan mere man ko jalāne lagī

chand kamre ki khiDki mein Thahra raha chandni raat jadu jagane lagi

chandni mere bistar talak aa gai aur aankhon se ninden uDane lagi

yaad ki Diary main ne kholi hai jab sukhe phulon se KHushbu si aane lagi

tez aandhi si chalne lagi dard ki aur ek ek waraq ko uDane lagi

khul rahe hain KHayalon ke sab baadban kashtiyan sahilon ki taraf hain ruli

nilgun nilgun sina-e-ab par chandni ki kiran chamchamane lagi

mausam-e-gul ke mahke qadam aa gae Dali Dali dhanak rang aanchal uDe

mere ganw mein chupke se aai saba yaad gulshan ki mujh ko satane lagi

buDhe pipal ki chhanw mein TuTa hua ek gharaunda hai miTTi ka baqi abhi

meri bachpan ki ek ek kahani mujhe de ke aawaz wapas bulane lagi

meri sanson mein mahka kare hai koi dil ki dhaDkan mein dhaDka kare hai koi

aankh ki putliyon mein basa hai koi main jo ghabra ke palken jhukane lagi

aam ki miThi KHushbu faza mein uDi jaise kanon mein shahnaiyan baj uThin

jaise sajan ka aaya sandesa sakhi gori hathon mein mehndi rachane lagi

main ki giton ki jogan hun 'husna' sada fan ke sahra mein dar-dar bhaTakti phirun

mujh ko manzil ki rahti hai har pal lagan ek jalan mere man ko jalane lagi