chand ke sath jal uThi main bhi

chāñd ke saath jal uThī maiñ bhī

der tak baam par rahī maiñ bhī

kyā huā Dhal rahī hai shaam agar

hai vahī tū abhī vahī maiñ bhī

tū jo bholā to maiñ bhī bhuul ga.ī

varna bholī na thī kabhī maiñ bhī

lab-e-dīvār-o-dar to patthar the

tere aage ḳhamosh thī maiñ bhī

kisī ko ma.alūm terī rātoñ meñ

ik sitāra banī rahī maiñ bhī

be-zarūrat tirī panāh meñ huuñ

itnī be-ḳhānumāñ na thī maiñ bhī

jazba-e-ishq kī farāḳh-dilī

tū jhukā thā to jhuk ga.ī maiñ bhī

chhāñv maiñ huuñ abhī duāoñ kī

huuñ kisī god kī palī maiñ bhī

chand ke sath jal uThi main bhi

der tak baam par rahi main bhi

kya hua Dhal rahi hai sham agar

hai wahi tu abhi wahi main bhi

tu jo bhola to main bhi bhul gai

warna bholi na thi kabhi main bhi

lab-e-diwar-o-dar to patthar the

tere aage KHamosh thi main bhi

kisi ko malum teri raaton mein

ek sitara bani rahi main bhi

be-zarurat teri panah mein hun

itni be-KHanuman na thi main bhi

jazba-e-ishq ki faraKH-dili

tu jhuka tha to jhuk gai main bhi

chhanw main hun abhi duaon ki

hun kisi god ki pali main bhi