chand mein nur sitaron mein sharar dekha hai

chāñd meñ nuur sitāroñ meñ sharar dekhā hai

jab bhī āñkhoñ meñ tirī aks-e-sahar dekhā hai

kaun hai jis ne bulāyā hai pahāḌoñ se mujhe

kaun thā jis kī duāoñ meñ asar dekhā hai

kaisī bastī hai ye kis tarah ke baasī haiñ yahāñ

jo milā us ke dil-o-jān meñ Dar dekhā hai

ḳhvāb hai yā hai haqīqat ki nazar kā dhoka

apne kāñdhoñ pe kisī aur kā sar dekhā hai

apnī aulād ke aage jo huā dast-e-savāl

us kī aahoñ na duāoñ meñ asar dekhā hai

is se pahle ki maiñ ārām se rakhtā paañv

is se pahle hī kisī aur ne ghar dekhā hai

haath bhī ḳhālī rahe raah meñ khaa.ī ho pahāḌ

jab bhī nikle haiñ kahāñ zād-e-safar dekhā hai

vo jo apne the jo apnā.e hue apne the

vo alag maiñ bhī judā kis ne magar dekhā hai

be-hunar mujh ko samajhnā na ‘muzaffar-īraj'

sab ne dil joḌne kā merā hunar dekhā hai

chand mein nur sitaron mein sharar dekha hai

jab bhi aankhon mein teri aks-e-sahar dekha hai

kaun hai jis ne bulaya hai pahaDon se mujhe

kaun tha jis ki duaon mein asar dekha hai

kaisi basti hai ye kis tarah ke basi hain yahan

jo mila us ke dil-o-jaan mein Dar dekha hai

KHwab hai ya hai haqiqat ki nazar ka dhoka

apne kandhon pe kisi aur ka sar dekha hai

apni aulad ke aage jo hua dast-e-sawal

us ki aahon na duaon mein asar dekha hai

is se pahle ki main aaram se rakhta panw

is se pahle hi kisi aur ne ghar dekha hai

hath bhi KHali rahe rah mein khai ho pahaD

jab bhi nikle hain kahan zad-e-safar dekha hai

wo jo apne the jo apnae hue apne the

wo alag main bhi juda kis ne magar dekha hai

be-hunar mujh ko samajhna na ‘muzaffar-iraj'

sab ne dil joDne ka mera hunar dekha hai