chand nikla hai raat aai hai

chāñd niklā hai raat aa.ī hai

tum bhī aao to kyā burā.ī hai

aañkh saaqī ne phir milā.ī hai

phir se tauba kī maut aa.ī hai

hosh aane lagā hai phir mujh ko

chashm-e-mai-gūñ tirī duhā.ī hai

zāhidoñ ne bhī aaj mai pī lī

kyūñki kaalī ghaTā jo chhā.ī hai

ishq-e-sādiq ne jaan de de kar

husn kī zindagī baḌhā.ī hai

zarre zarre meñ husn hai lekin

ishq kī chār-sū ḳhudā.ī hai

dil meñ jab tak hai baat apnī hai

muñh se niklī to phir parā.ī hai

jaan le jaao ġham na le jaao

umr bhar kī yahī kamā.ī hai

ḳhud se 'ḳhākī' na tere paas aaya

ḳhvāhish-e-dīd khīñch laa.ī hai

chand nikla hai raat aai hai

tum bhi aao to kya burai hai

aankh saqi ne phir milai hai

phir se tauba ki maut aai hai

hosh aane laga hai phir mujh ko

chashm-e-mai-gun teri duhai hai

zahidon ne bhi aaj mai pi li

kyunki kali ghaTa jo chhai hai

ishq-e-sadiq ne jaan de de kar

husn ki zindagi baDhai hai

zarre zarre mein husn hai lekin

ishq ki chaar-su KHudai hai

dil mein jab tak hai baat apni hai

munh se nikli to phir parai hai

jaan le jao gham na le jao

umr bhar ki yahi kamai hai

KHud se 'KHaki' na tere pas aaya

KHwahish-e-did khinch lai hai