chand par yun kale baadal dekh kar achchha laga

chāñd par yuuñ kaale bādal dekh kar achchhā lagā

ik nazar dekhā jo us ko umr bhar achchhā lagā

misl-e-majnūñ reg-zāroñ kā safar achchhā lagā

terī ḳhātir jiitī baazī haar kar achchhā lagā

hañste hañste jaan le lī jaan ne ik din mirī

jaañ luTā dī maiñ ne jis dam jaan par achchhā lagā

terī yādoñ ke sahāre jī rahā huuñ aaj bhī

guzre jo hamrāh tere vo safar achchhā lagā

apnī qismat par karūñ maiñ rashk jitnā kam hai vo

kyā batā.ūñ tum se mil kar kis qadar achchhā lagā

ūñche mahloñ kī rihā.ish ho mubārak aap ko

mujh ko apne gaañv kā miTTī kā ghar achchhā lagā

mujh ko apnī mehnatoñ par hai yaqīñ aur naaz bhī

ḳhuuñ pasīne se milā hai jo samar achchhā lagā

dād-o-tahsīñ kī tamanna kī nahīñ tū ne kabhī

dekh kar 'sārim' tumhārā ye jigar achchhā lagā

chand par yun kale baadal dekh kar achchha laga

ek nazar dekha jo us ko umr bhar achchha laga

misl-e-majnun reg-zaron ka safar achchha laga

teri KHatir jiti bazi haar kar achchha laga

hanste hanste jaan le li jaan ne ek din meri

jaan luTa di main ne jis dam jaan par achchha laga

teri yaadon ke sahaare ji raha hun aaj bhi

guzre jo hamrah tere wo safar achchha laga

apni qismat par karun main rashk jitna kam hai wo

kya bataun tum se mil kar kis qadar achchha laga

unche mahlon ki rihaish ho mubarak aap ko

mujh ko apne ganw ka miTTi ka ghar achchha laga

mujh ko apni mehnaton par hai yaqin aur naz bhi

KHun pasine se mila hai jo samar achchha laga

dad-o-tahsin ki tamanna ki nahin tu ne kabhi

dekh kar 'sarim' tumhaara ye jigar achchha laga