chand sitaron se kya puchhun kab din mere phirte hain

chāñd sitāroñ se kyā pūchhūñ kab din mere phirte haiñ

vo to bichāre ḳhud haiñ bhikārī Dere Dere phirte haiñ

jin galiyoñ meñ ham ne sukh kī sej pe rāteñ kaaTī thiiñ

un galiyoñ meñ be-kal ho kar sāñjh-savere phirte haiñ

ruup sarūp kī jot jagānā is nagrī meñ jokhim hai

chāroñ khoñT bagūle ban kar ghor añdhere phirte haiñ

jin ke shaam baran sāyoñ meñ merā man sustāyā thā

ab tak merī nazroñ meñ vo baal ghanere phirte haiñ

koī hameñ bhī to samjhā do un par dil kyoñ riijh gayā

tīkhī chitvan bāñkī chhab vaale bahutere phirte haiñ

ik din us ne nain milā ke sharmā ke muñh pherā thā

tab se sundar sundar sapne man ko ghere phirte haiñ

is nagrī ke baaġh aur ban kī yaaro liilā nyārī hai

is meñ panchhī sar pe uThā kar apne basere phirte haiñ

kaise kaise mīThe boloñ se ham ko parchāte haiñ

kaise kaise bhes badal kar chor luTere phirte haiñ

log to dāman sī lete haiñ jaise bhī jī lete haiñ

'ābid' ham dīvāne haiñ jo baal bikhere phirte haiñ

chand sitaron se kya puchhun kab din mere phirte hain

wo to bichaare KHud hain bhikari Dere Dere phirte hain

jin galiyon mein hum ne sukh ki sej pe raaten kaTi thin

un galiyon mein be-kal ho kar sanjh-sawere phirte hain

rup sarup ki jot jagana is nagri mein jokhim hai

chaaron khonT bagule ban kar ghor andhere phirte hain

jin ke sham baran sayon mein mera man sustaya tha

ab tak meri nazron mein wo baal ghanere phirte hain

koi hamein bhi to samjha do un par dil kyon rijh gaya

tikhi chitwan banki chhab wale bahutere phirte hain

ek din us ne nain mila ke sharma ke munh phera tha

tab se sundar sundar sapne man ko ghere phirte hain

is nagri ke bagh aur ban ki yaro lila nyari hai

is mein panchhi sar pe uTha kar apne basere phirte hain

kaise kaise miThe bolon se hum ko parchate hain

kaise kaise bhes badal kar chor luTere phirte hain

log to daman si lete hain jaise bhi ji lete hain

'abid' hum diwane hain jo baal bikhere phirte hain