chand suraj na sahi koi sitara hota

chāñd sūraj na sahī koī sitārā hotā

rahnumā.ī ke liye koī hamārā hotā

ham ne kirdār jo andar se sañvārā hotā

phir to bāhar bhī bahut ḳhuub nazārā hotā

aap jhūTā hī sahī rishta banā.e rakhte

Dūbne vaale ko tinke kā sahārā hotā

us ne bhejā hai mohabbat ke liye duniyā meñ

kaash is baat ko sīnoñ meñ utārā hotā

jis meñ tā'līm mohabbat kī milā kartī ho

kaash aisā bhī kahīñ koī idāra hotā

har musībat se nikal saktā huuñ tadbīroñ se

kaash taqdīr se bachne kā bhī chāra hotā

sab kī āñkhoñ meñ samā jaatī vo tasvīr 'adīb'

chāñd ke 'aks meñ jo 'aks tumhārā hotā

chand suraj na sahi koi sitara hota

rahnumai ke liye koi hamara hota

hum ne kirdar jo andar se sanwara hota

phir to bahar bhi bahut KHub nazara hota

aap jhuTa hi sahi rishta banae rakhte

Dubne wale ko tinke ka sahaara hota

us ne bheja hai mohabbat ke liye duniya mein

kash is baat ko sinon mein utara hota

jis mein ta'lim mohabbat ki mila karti ho

kash aisa bhi kahin koi idara hota

har musibat se nikal sakta hun tadbiron se

kash taqdir se bachne ka bhi chaara hota

sab ki aankhon mein sama jati wo taswir 'adib'

chand ke 'aks mein jo 'aks tumhaara hota