chand viran hai sadiyon se mere dil ki tarah

chāñd vīrān hai sadiyoñ se mire dil kī tarah

zindagī ġham hai ḳhalā meñ mirī manzil kī tarah

kurra-e-arz hai ik markaz-e-hañgāma-e-shauq

bahr-e-be-āb meñ tahzīb ke sāhil kī tarah

zarra-e-ḳhāk se hai sho.ala-e-jauhar kī numūd

jis ne sūraj ko bhī dekhā hai muqābil kī tarah

kal ke chañgez-o-halākū haiñ pas-e-parda-e-ḳhāk

surḳh-rū the jo kabhī ḳhanjar-e-qātil kī tarah

mere qadmoñ ke nishāñ chāñd pe raḳhshanda haiñ

aap aa jā.iye āvāra-e-manzil kī tarah

girah-e-shām-o-sahar ahl-e-ḳhirad se na khulī

zindagī aaj bhī hai uqda-e-mushkil kī tarah

chand viran hai sadiyon se mere dil ki tarah

zindagi gham hai KHala mein meri manzil ki tarah

kurra-e-arz hai ek markaz-e-hangama-e-shauq

bahr-e-be-ab mein tahzib ke sahil ki tarah

zarra-e-KHak se hai shoala-e-jauhar ki numud

jis ne suraj ko bhi dekha hai muqabil ki tarah

kal ke changez-o-halaku hain pas-e-parda-e-KHak

surKH-ru the jo kabhi KHanjar-e-qatil ki tarah

mere qadmon ke nishan chand pe raKHshanda hain

aap aa jaiye aawara-e-manzil ki tarah

girah-e-sham-o-sahar ahl-e-KHirad se na khuli

zindagi aaj bhi hai uqda-e-mushkil ki tarah