chandni chhiTki hui ho to ghazal hoti hai

chāñdnī chhiTkī huī ho to ġhazal hotī hai

jal-parī paas khaḌī ho to ġhazal hotī hai

dil-nashīñ koī nazāra koī dilkash manzar

baat dilchasp koī ho to ġhazal hotī hai

yā kisī dard meñ Duubī huī āvāz-e-nahīf

yā koī chīḳh sunī ho to ġhazal hotī hai

shā.irī naam hai ehsās ke lau paane kā

aag sī dil meñ dabī ho to ġhazal hotī hai

koī khiltā huā chehrā koī ġhuncha koī phuul

aañkh sairāb huī ho to ġhazal hotī hai

darmiyāñ aap ke mere koī haa.il ho jaa.e

koī dīvār khaḌī ho to ġhazal hotī hai

koī jiddat koī nudrat koī pākīza ḳhayāl

haañ koī baat na.ī ho to ġhazal hotī hai

pahle shā.ir ko mile zehn-e-rasā qalb-gudāz

phir vo lafzoñ kā dhanī ho to ġhazal hotī hai

aam hālāt meñ hotī nahīñ ai 'tāj' ġhazal

kuchh na kuchh dard-sarī ho to ġhazal hotī hai

chandni chhiTki hui ho to ghazal hoti hai

jal-pari pas khaDi ho to ghazal hoti hai

dil-nashin koi nazara koi dilkash manzar

baat dilchasp koi ho to ghazal hoti hai

ya kisi dard mein Dubi hui aawaz-e-nahif

ya koi chiKH suni ho to ghazal hoti hai

shairi nam hai ehsas ke lau pane ka

aag si dil mein dabi ho to ghazal hoti hai

koi khilta hua chehra koi ghuncha koi phul

aankh sairab hui ho to ghazal hoti hai

darmiyan aap ke mere koi hail ho jae

koi diwar khaDi ho to ghazal hoti hai

koi jiddat koi nudrat koi pakiza KHayal

han koi baat nai ho to ghazal hoti hai

pahle shair ko mile zehn-e-rasa qalb-gudaz

phir wo lafzon ka dhani ho to ghazal hoti hai

aam haalat mein hoti nahin ai 'taj' ghazal

kuchh na kuchh dard-sari ho to ghazal hoti hai