chaar-su phaila hua kar-e-jahan rahne diya

chār-sū phailā huā kār-e-jahāñ rahne diyā

ruk ga.e ham aur har shai ko ravāñ rahne diyā

apne gumbad meñ kahāñ se aa.egī taaza havā

ik darīcha bhī khulā ham ne kahāñ rahne diyā

bāl-o-par qaa.em the sābit himmat-e-parvāz thī

kuchh zamīñ raas aa ga.ī bas āsmāñ rahne diyā

roz-e-raushan aaj sūraj ne kiyā goyā kamāl

barf-sāmāñ qatra qatra āsmāñ rahne diyā

ham ne apne vāste bas ik jazīra chun liyā

aur bahr-e-be-karāñ ko be-karāñ rahne diyā

zindagānī ho ga.ī gosha-nashīnī meñ tamām

mil to saktā thā magar saarā jahāñ rahne diyā

apnī qismat ke liye vo ik sitāra thā bahut

dastaras to thī magar sab āsmāñ rahne diyā

kuchh mizāj apnā hī thā 'betāb' un sab se judā

bas akele chal diye ham kārvāñ rahne diyā

chaar-su phaila hua kar-e-jahan rahne diya

ruk gae hum aur har shai ko rawan rahne diya

apne gumbad mein kahan se aaegi taza hawa

ek daricha bhi khula hum ne kahan rahne diya

baal-o-par qaem the sabit himmat-e-parwaz thi

kuchh zamin ras aa gai bas aasman rahne diya

roz-e-raushan aaj suraj ne kiya goya kamal

barf-saman qatra qatra aasman rahne diya

hum ne apne waste bas ek jazira chun liya

aur bahr-e-be-karan ko be-karan rahne diya

zindagani ho gai gosha-nashini mein tamam

mil to sakta tha magar sara jahan rahne diya

apni qismat ke liye wo ek sitara tha bahut

dastaras to thi magar sab aasman rahne diya

kuchh mizaj apna hi tha 'betab' un sab se juda

bas akele chal diye hum karwan rahne diya