chaara-e-kar hua had se siwa ho jaana

chāra-e-kār huā had se sivā ho jaanā

ab mire dard ko aayā hai davā ho jaanā

ham samajhte haiñ yahī kun-fayakūñ kā hāsil

ik ḳhamoshī se tabassum kī adā ho jaanā

zindagī kā yahī rishta hai musībat kā sabab

saañs ukhaḌnā girah-e-dil kā hai vā ho jaanā

ai du'ā mujh se shikāyat hai jafā-kāroñ ko

tujh se ye kis ne kahā thā ki gila ho jaanā

ai ajal sham'-sifat soz-e-mohabbat ke tufail

aa gayā hai hameñ aap apnī qazā ho jaanā

bhuul jaanā na mirī aah ko haañ yaad rahe

un ke kūche meñ agar terā sabā ho jaanā

ye batāne kī nahīñ baat jatāne kī nahīñ

ḳhud-ba-ḳhud chāhiye iz.hār-e-vafā ho jaanā

sīkhiye lutf ki kamyāb ise kahte haiñ

kis ko aatā nahīñ duniyā meñ ḳhafā ho jaanā

jabr par sabr ko āsāñ na samajh banda-e-aql

kaam himmat kā hai rāzī-ba-razā ho jaanā

merī aahoñ se jo tūfān-e-sharar uTThā thā

bijliyāñ siikh ga.iiñ us se balā ho jaanā

ik musībat hai musībat kī tamanna 'shākir'

ik balā ho gayā himmat kā balā ho jaanā

chaara-e-kar hua had se siwa ho jaana

ab mere dard ko aaya hai dawa ho jaana

hum samajhte hain yahi kun-fayakun ka hasil

ek KHamoshi se tabassum ki ada ho jaana

zindagi ka yahi rishta hai musibat ka sabab

sans ukhaDna girah-e-dil ka hai wa ho jaana

ai du'a mujh se shikayat hai jafa-karon ko

tujh se ye kis ne kaha tha ki gila ho jaana

ai ajal sham'-sifat soz-e-mohabbat ke tufail

aa gaya hai hamein aap apni qaza ho jaana

bhul jaana na meri aah ko han yaad rahe

un ke kuche mein agar tera saba ho jaana

ye batane ki nahin baat jatane ki nahin

KHud-ba-KHud chahiye izhaar-e-wafa ho jaana

sikhiye lutf ki kamyab ise kahte hain

kis ko aata nahin duniya mein KHafa ho jaana

jabr par sabr ko aasan na samajh banda-e-aql

kaam himmat ka hai raazi-ba-raza ho jaana

meri aahon se jo tufan-e-sharar uTTha tha

bijliyan sikh gain us se bala ho jaana

ek musibat hai musibat ki tamanna 'shakir'

ek bala ho gaya himmat ka bala ho jaana